MOLAO O QOTSITSWENG MOLAONG WA MOTHEO
WA KOPANO YA DINAHA TSA AFRIKA
Rona, Dihlooho tsa Puso le Mebuso eo e leng Ditho tsa Mokgatlo wa Kopano ya Dinaha tsa Afrika (OAU):
Mopresidente wa Rephaboliki ya Demokerasi ya Batho ba Alejeria
Mopresidente wa Rephaboliki ya Afrika Bohareng
Mopresidente wa Rephaboliki ya Tjhate (Chad)
Tonakgolo ya Rephaboliki ya Demokerasi ya Bofederale ya Ithopia (Ethiopia)
Mopresidente wa Rephaboliki ya Kana (Ghana)
Mopresidente wa Rephaboliki ya Kenya
Tonakgolo ya Lesotho
Moetapele wa Ntwa ya la 1 Lwetse ya Mokgopi o Moholo wa Setjhaba sa Maaraba a Laeberia a Jamarihiya
Mopresidente wa Rephaboliki ya Kopano ya Thanzania
Mopresidente wa Rephaboliki ya Thoko (Togo)
RE KGOTHADITSWE ke mehopolo e metle e ileng ya tataisa bathehi ba Mokgatlo wa Kontinente ya rona le meloko ya Mohopolo ona wa Maafrika bakeng sa boikemisetsoba ho ntshetsa pele kopano, bonngwe, kamohelano le tshebedisano pakeng tsa baahi ba Afrika esita le Mebuso e meng ya Afrika;
HA RE LEKOLA maano le merero e boletsweng Lengolong la tumello la Mokgatlo wa Kopano ya Dinaha tsa Afrika esita le Selekane se thehilweng bakeng sa Setjhaba sa Maafrika sa Kgwebo;
RE HOPOLA boitseko bo matla bo ileng ba etswa ke batho ba rona esita le dinaha tsa rona mabapi le ho ba le boikemelo ba puso, ho ba le seriti sa botho esita le bolokolohi ho tsa moruo;
RE FUMANA HORE esale ho tloha sethathong, Mokgatlo ona wa Kopano ya Dinaha tsa Afrika o bile le seabo sa bohlokwa mme se seholo malebana le tokoloho ya kontinente, ho amohela boitsebahatso bo tshwanang esita le tshebetso ya ho theha kopano ya kontinente ya rona mme ebile e fane ka moralo o ikgethang bakeng sa tshebetso ya kopanelo mona Afrika esita le dikamano tsa rona le dinaha tse ding tsohle tsa lefatshe;
RE IKEMISEDITSE ho amohela diphepetso tse fapaneng tse tobileng kontinente ya rona esita le batho malebana le bophelo ba kahisano, moruo esita le diphetoho tsa sepolotiki tse bang teng mona lefatsheng;
RE A DUMELA hore ho hlokeha hore ho potlakiswe mosebetsi wa ho sebedisa Selekane ho theha Setjhaba sa Moruo sa Maafrika e le ho etsa hore ho be le tswelopele ya moruo wa setjhaba mona Afrika esita le hona ho ba le bokgoni bo feletseng ba ho lwantshana le mathata ao re tla tobana le ona a tswetsweng ke mokgwa ona o tshwanang wa ho sebedisana ka lefatshe lohle;
RE LAOLWA ke tjhebelopele eo re nang le yona ya Afrika e kopaneng mme e matla esita le yona tlhoko ya ho aha selekane pakeng tsa mebuso esita le mekga e fapaneng ya setjhaba se tswetseng pele, ka ho qolleha basadi, batjha le mokga wa poraefete e le ho matlafatsa bonngwe le dikamano pakeng tsa batho ba rona;
RE A HLOKOMELA hore mathata a dikgohlano mona Afrika a baka ditshitiso tse kgolo kgahlano le tswelopele ya kahisano le moruo wa setjhaba kontinenteng ya rona esita le hona ho ntshetsa pele kgotso, tshireletso le botsitso e le dintlha tse hlokehang bakeng sa ho phethahatsa lenane la ntshetsopele le dikamano;
RE IKEMISEDITSE ho ntshetsa pele le ho baballa ditokelo tsa botho, ho hokahanya ditsha tsa demokerasi le moetlo esita le ho etsa bonnete ba hore ho ba le puso e lokileng e kgannwang ka tshebediso ya molao;
RE BILE RE IKEMISEDITSE ho etsa tsohle tse tshwanelehang bakeng sa ho matlafatsa ditsha tsa rona tse tlwaelehileng esita le ho di fa matla a hlokehang esita le tseo di lokelang ho ba le tsona e le hore di tle di tsebe ho phetha mesebetsi ya tsona ka tshwanelo;
RE DUMELLANE KA DINTLHA TSENA TSE LATELANG:
Temana ya pele
Ditlhaloso
Molaong ona o tswang molaong wa motheo:
Ka molao re bolela molao wa jwale o tswang molaong wa motheo;
Ka seboka re bolela Seboka sa Dihlooho tsa Puso esita le Mmuso wa Kopano;
Ka lengolo ho bolelwa Lengolo la Mokgatlo wa Kopano ya Dinaha tsa Afrika;
Ka komiti ho bolelwa Komiti e Ikgethang ya Setekgeniki ya Kopano;
Ka lekgotla ho bolelwa Lekgotla la Kopano la Moruo, Kahisano le Moetlo;
Ka lekgotla la dinyewe ho bolelwa Lekgotla la Toka la Kopano;
Ka lekgotla la phethahatso ho bolelwa Lekgotla la Phethahatso la Matona a Kopano;
Ka puso oo e leng setho ho bolelwa puso eo e leng setho sa Kopano;
Ka mokgatlo ho bolelwa Mokgatlo wa Kopano ya Dinaha tsa Afrika;
Ka palamente ho bolelwa Palamente ya Kopano e thehilweng Mohopolong wa Maafrika;
Ka kopano ho bolelwa Kopano ya Dinaha tsa Afrika e thehilweng ka molao o tswang molaong wa motheo.
Temana ya bobedi
Theho
Kopano ya Dinaha tsa Afrika e thehwa ka dipehelo tsa molao o qotsitsweng molaong wa motheo.
Temana ya boraro
Merero
Merero ya Kopano e tla ba ho:
Theha kopano e tiileng mme e tsitsitseng pakeng tsa dinaha tsa Afrika esita le pakeng tsa batho ba Afrika;
Tshireletsa boemo, meedi le boikemelo ba Mebuso eo e leng ditho tsa yona;
Potlakisa kamano ya puso kapa polotiki le moruo wa setjhaba kontinenteng ya rona;
Ntshetsa pele le ho tshireletsa maemo ao Maafrika a dumellanang ka ona ditabeng tse amang kontinente esita le batho ba phelang ho yona;
Kgothaletsa hore ho be le tshebedisano ya dinaha tsa matjhaba mme ho ntse ho hlokomelwa hore ho latelwe Lengolo la tumello la Dinaha tse Kopaneng le Phatlalatso e akaretsang ya Ditokelo tsa Botho;
Ntshetsa pele kgotso, tshireletso le botsitso ka hare ho kontinente;
Ntshetsa pele maano a demokerasi esita le ditsha, ho ba le seabo ha batho esita le puso e lokileng;
Ntshetsa pele le ho baballa ditokelo tsa botho ho latela Lengolo la tumello la Maafrika mabapi le Ditokelo tsa Botho esita le disebediswa tse ding tsa ditokelo tsa botho;
Theha maemo a hlokehang a tla dumella kontinente ho phethahatsa boikarabelo ba yona mabapi le moruo ka kakaretso le ditherisano tsa matjhaba;
Kgothaletsa hore ho be le tswelopele ya moruo, kahisano le meetlo esita le dikamano kapa tshebedisano ya moruo ka hare ho Afrika;
Kgothaletsa hore ho be le tshebedisano mahlakoreng ohle a mesebetsi ya batho e le ho phahamisa maemo a bophelo a baahi ba Afrika;
Hokela le ho theha dikamano tsa maano a Ditjhaba tsa Moruo wa Mabatowa bakeng sa ho kgona butlebutle ho phethahatsa merero ya Kopano;
Tiisa hore ho be le tswelopele ya kontinente ka ho ntshetsa pele diphuputso mahlakoreng ohle a bophelo empa haholoholo lehlakoreng la saense le thekenoloji;
Sebedisana le dinaha tse ding tsa matjhaba tseo e leng ditho e le ho fedisa mahloko a ka thibelwang esita le ho ntshetsa pele bophelo bo botle ka hara kontinente.
Temana ya bone
Maano
Kopano e tla sebetsa ho latela maano ana a latelang:
Tekano ya maemo le tshebedisano ya Mebuso eo e leng ditho tsa Kopano;
Tlhokomelo ya meedi e teng mabapi le ho fumana boikemelo ba bolokolohi;
Ho ba le seabo ha batho ba Afrika mesebetsing ya Kopano;
Tharollo ya dikgohlano ka kgotso le ka ntle ho dikgoka pakeng tsa Mebuso eo e leng ditho tsa Kopano ka ditsela tse loketseng mme le tsela e laolwang ke Seboka;
Thibelo ya tshebediso ya dikgoka kapa ditshoso pakeng tsa mebuso eo e leng Ditho tsa Kopano
Ho se itshunyatshunye ha mmuso o mong oo e leng Setho sa Kopano mererong ya lehae ya mmuso o mong;
Tokelo ya Kopano ho kena dipakeng ka ho hatella diqeto tsa Seboka ha mmuso oo e leng Setho sa Kopano o tlola molao ka dintwa tsa tlolo ya molao, polao ya setjhaba esita le tlolo ya molao kgahlano le ditshwanelo tsa botho;
Ho phedisana ka kgotso ha mebuso eo e leng ditho tsa Kopano esit ale tokelo ya ho phela ka kgotso le ka tshireletso;
Tokelo ya Mmuso o mong le o mong oo e leng setho sa Kopano ho kopa tshireletso ho Kopano e le ho etsa bonnete ba hore ho ba le kgotso le tshireletso;
Ho ntshetsa pele boikemelo ka hare ho meralo ya Kopano;
Ntshetsopele ya tekano ya bong;
Tlhokomelo ya maano a demokerasi, ditokelo tsa botho, puso e tsamaiswang ka molao esita le puso e lokileng;
Tlhokomelo ya hore ho be le tlhweko ya bophelo ba batho, ho nyefola le ho hana ditshila esita le tlhaselo ya puso, diketso tsa dikgoka esita le mesebetsi e sa lokang;
Nyediso le ho hana diphetoho tsa mmuso tse sa yeng ka molao wa motheo.
Temana ya bohlano
Ditho tsa Mokgatlo wa Kopano
Ditho tsa Mokgatlo wa Kopano e tla ba:
Palamente ya Mohopolo wa Maafrika;
Khomishene;
Komiti ya Baemedi ba motjhaotjhele ka nako tsohle;
Dikomiti tse Ikgethang tsa Setekgeniki;
Lekgotla la Moruo, Kahisano le Meetlo;
Ditsha tsa Ditjhelete.
Tse ding tsa ditho tseo Seboka se ka rerang ho di theha.
Temana ya botshelela
Seboka
Seboka se tla thehwa ka Dihlooho tsa Puso le Mmuso kapa baemedi ba kgethilweng ka molao.
Seboka e tla ba setho se phahameng ka ho fetisisa sa Kopano.
Seboka se ta kopana bonyane hang ka selemo ka kopano e tlwaelehileng. Ka lebaka la kopo ya mmuso o le mong oo e leng setho sa Kopano le ka tumello ya bongata ba pedi-borarong ba mebuso eo e leng Ditho tsa Kopano, Seboka se tla kopana ka tsela ya kopano e sa tlwaelehang.
Ofisi ya Modulasetulo wa Seboka e tla sebetsa nako ya selemo. Modulasetulo e tla ba Hlooho ya Puso kapa Mmuso mme a kgethilwe ka ditherisano pakeng tsa Ditho tsa Kopano.
Temana ya bosupa
Diqeto tsa Seboka
Diqeto tsa Seboka di tla nkuwa ka hore ditho tsohle di dumellane. Haeba sena se sa fihlellwe, qeto e tla nkuwa ho latela palo ya bongata ba pedi-borarong ya mebuso eo e leng Ditho tsa Kopano. Le ha ho le jwalo, ditaba tsa tsamaiso tse kenyeletsang ntlha ya hore na taba e tsamaisitswe ka molao kapa tjhe, e tla ba qeto ya bongata bo ka fumanehang ka bobebe.
Palo ya bongata ba pedi-borarong ya mebuso eo e leng Ditho tsa Kopano e tla etsa lenane le lokelang ho ba teng la ditho pele kopano ya seboka e ka qala. Sena se tla etsahala kopanong e nngwe le e nngwe.
Temana ya borobedi
Melao ya Tsela ya Tshebetso ya Seboka
Mesebetsi ya Seboka e tla ba ho:
Laola maano a tlwaelehileng a Kopano;
b Amohela, hlahloba le ho etsa qeto malebana le dipehelo le dikgothaletso tse tswang dithong tse ding tsa Kopano;
Hlahloba dikopo tsa ho ba Setho sa Kopano;
Theha karolo kapa setho sefe kapa sefe sa Kopano;
Laola tshebediso ya maano le diqeto tsa Kopano esita le ho etsa bonnete ba hore mebuso yohle eo e leng Ditho tsa Kopano e a di hlopmpha;
Amohela ditekanyetso kapa bajete ya Kopano;
Ho laela Lekgotla la Phethahatso mabapi le taolo ya dikgohlano, dintwa esita le maemo a tshohanyetso esita le ho baballa kgotso;
Ho amohela le ho fedisa mosebetsi wa baahlodi ba Makgotla a dinyewe a Toka;
Ho amohela Modulasetulo wa Khomishene esita le batlatsi ba hae esita le Bakomishenara ba Khomishene le ho laola mesebetsi ya bona le nako ya tshebetso ya bona.
Seboka se ka nna sa abela setho sefe kapa sefe sa Kopano matla a sona kapa e meng ya mesebetsi ya sona.
Temana ya leshome
Lekgotla la Phethahatso le tla ba le ditho tse thehilweng ka Matona a Ditaba tsa ka ntle kapa Matona a mang a kgethilweng ke Mebuso ya Ditho tsa Kopano.
Lekgotla lena la phethahatso le tla kopana bonyane habedi ka selemo ka dikopano tse tlwaelehileng. Le tla kopana hape ka dikopano tse sa tlwaelehang ka kopo ya se seng sa Ditho tsa Kopano le ka kamohelo ya palo ya bobedi-borarong ya ditho tsohle tsa Kopano.
Temana ya leshome le motso o mong
Diqeto tsa Lekgotla la Phethahatso
Diqeto tsa Lekgotla la Phethahatso di tla nkuwa ka hore ditho tsohle di dumellane. Haeba sena se sa fihlellwe, qeto e tla nkuwa ho latela palo ya bongata ba pedi-borarong ya mebuso eo e leng Ditho tsa Kopano. Le ha ho le jwalo, ditaba tsa tsamaiso tse kenyeletsang ntlha ya hore na taba e tsamaisitswe ka molaokapa tjhe, e tla ba qeto ya bongata bo ka fumanehang ka bobebe.
Palo ya bongata ba pedi-borarong ya mebuso eo e leng Ditho tsa Kopano e tla etsa lenane le lokelang ho ba teng la ditho pele kopano ya seboka e ka qala. Sena se tla etsahala kopanong e nngwe le e nngwe ya Lekgotla la Phethahatso.
Temana ya leshome le metso e mmedi
Lekgotla la Phethahatso le tla hokahanya le ho etsa diqeto mabapi le maano a tshebetso ditabeng tse amang ditho tsa Kopano tse kenyeletsang dintlha tsena tse latelang:
a Kgwebo dinaheng tse ka ntle;
b Matla eneji, indasteri le dimenerale;
c Dijo, temo le diphoofolo, dihlahiswa tse tswang mehlapeng esita le meru;
d Metsi le nosetso;
e Paballo ya tikoloho, mesebetsi ya batho, diqomatsi le thibelo ya tsona;
g Inshorense;
h Thuto, meetlo, bophelo le ntshetsopele ya basebetsi;
i Saense le thekenoloji;
Botjhaba, bodulo le ditaba tse amang melata;
Tshireletso ya setjhaba, hammoho le theho ya maano a mme le ngwana esita le maano a amang batho ba holofetseng;
Theho ya tsela ya phano ya dikgau tsa Maafrika, dimedale le meputso.
Lekgotla la Phethahatso le tla ikarabella ho Seboka. E tla sebetsana le ditaba tse lebisitsweng ho yona mme e laole tshebediso ya maano a thehilweng ke Seboka.
Lekgotla la Phethahatso le ka aba e meng ya mesebetsi e boletsweng serapeng sa pele sa Temana ena ho Dikomiti tse Ikgethang tsa Setekgenikitse thehilweng ho latela Temana ya Leshome le metso e mene ya molao ona o tswang molaong wa motheo.
Temana ya leshome le metso e mene
Dikomiti tse Ikgethang tsa Setekgeniki
Theho le Tlhophiso ya Ditho
Mona ho thehwa Dikomiti tsena tse latelang tse ikgethang tsa setekgeniki mme tsona di ikarabella ho Lekgotla la Phethahatso:
Komiti ya Moruo wa mapolasi esita le Ditaba tsa temo;
Komiti ya Ditjhelete le Ditaba tsa Tjhelete;
Komiti ya Kgwebo, Ditlwaelo le Ditaba tsa Melata;
Komiti ya Diindasteri, Saense le Thekenoloji, Matla, Dibewa tsa tlhaho le Tikoloho;
Komiti ya Dipalangwang, Dikgokahano le Bohahlaudi;
Komiti ya Bophelo bo botle, Mesebetsi le Ditaba tsa Leaho; esita le
Komiti ya Thuto, Meetlo le Basebetsi.
Haeba ho hlokeha, Seboka se tla fetola dikomiti tse ntseng di sebetsa kapa se thehe dikomiti tse ding tse ntjha.
Dikomiti tse Ikgethang tsa Setekgeniki di tla kenyeletsa Matona kapa bahlanka ba phahameng ba ikarabellang mekgeng e welang mahlakoreng ao ba nang le bokgoni ho ona.
Temana ya leshome le metso e mehlano
Mesebetsi ya Dikomiti tse Ikgethang tsa Setekgeniki
Komiti e nngwe le e nngwe e tla phetha tse latelang ho latela matla a tshebetso ya yona:
Hlophisa merero le manane a Kopano mme e nehelane ka ona ho Lekgotla la Phethahatso;
Etsa bonnete ba ho hlahloba, ho fana ka pehelo le ho lekodisisa phethahatso ya diqeto tse nkilweng ke ditho tsa Kopano;
Ho etsa bonnete ba ho hokahanya le ho ntshetsa pele merero le manane a Kopano;
Ho nehelana ho lekgotla la Phethahatso ka boithaopo kapa ka ho kotjwa ke Lekgotla la Phethahatso, dipehelo le dikgothaletso malebana le phethahatso ya dintlha tse beilweng ke molao ona o tswang molaong wa motheo; esita le ho
Phetha mesebetsi efe kapa efe eo e e abetsweng ka lebaka la ho etsa bonnete ba hore ho phethahatswa dipehelo tsa molao ona o tswang molaong wa motheo.
Temana ya leshome le metso e tsheletseng
Dikopano
Ho latela ditaelo tsa Lekgotla la Phethahatso, Komiti e nngwe le e nngwe e tla kopana ka makgetlo a hlokehang mme e tla hlophisa melao ya yona ya tshebetso mme ebe e e lebisa ho Lekgotla la Phethatatso e le hore e amohelwe.
Temana ya leshome le metso e supileng
Palamente ya Mohopolo wa Seafrika
E le ho hlokomela hore baahi bohle ba Afrika ba be le seabo se tletseng mabapi le ntshetsopele le kopanelo ya moruo wa kontinente, Palamente ya Mohopolo wa Maafrika e tla thehwa.
Palo ya ditho, matla, mesebetsi le tlhophiso ya Palamente ya Mohopolo wa Maafrika e tla hlaloswa ho latela tatelano ya maemo a amanngwang le yona.
Temana ya leshome le metso e robedi
Lekgotla la Toka
Lekgotla la Toka la Kopano le tla thehwa;
Melao, palo ya ditho le mesebetsi ya Lekgotla lena la toka e tla hlaloswa ka ho latela tatelano ya maemo a basebetsi.
Temana ya leshome le metso e robong
Ditsha tsa Tshebetso ya Tjhelete
Mokgatlo wa Kopano o tla ba le ditsha tse latelang tsa tjhelete tseo melao le melawana ya tsona e tla hlaloswa ho latela tatelano ya maemo a basebetsi:
Banka e Bohareng ya Afrika;
Letlole la Tjhelete la Afrika;
Banka ya Matsete ya Afrika.
Temana ya mashome a mabedi
Khomishene
Ho tla thehwa Khomishene ya Kopano e tla ba Bongodi ba Kopano.
Khomshene e tla ba le Modulasetulo, batlatsi le Bakomishenara. Bona ba tla thuswa ke basebetsi ba bang bakeng sa ho phethahatsa tshebetso e ntle ya Khomishene.
Sebopeho, mesebetsi le melawana ya Khomishene e tla behwa ke Seboka.
Temana ya mashome a mabedi a motso o mong
Komiti ya Baemedi ya nako tsohle (motjhaotjhele)
Ho tla thehwa Komiti ya Baemedi ya nako tsohle. E tla thehwa ka Baemedi ba nako tsohle ba Kopano esita le batho ba nang le bokgoni mme e le Ditho tsa Kopano.
Komiti ya Baemedi ya nako tsohle e tla ba le boikarabelo ba ho hlophisa mosebetsi wa Lekgotla la Phethahatso esita le ho sebetsa ka ho latela ditaelo tsa Lekgotla la Phethahatso. Eka theha dikomiti tse nyenyane kapa dihlotshwana tsa tshebetso haeba ho hlokeha jwalo.
Temana ya mashome a mabedi a metso e mmedi
Lekgotla la Moruo, Kahisano le Meetlo
Lekgotla la Moruo, Kahisano le Meetlo e tla ba karolo ya boeletsi e theilweng ka dihlopha tse fapaneng tsa kahisano le seporofeshenale tsa Mebuso eo e leng Ditho tsa Kopano.
Mesebetsi, matla palo ya ditho le tlhophiso ya Lekgotla la Moruo, Kahisano le Meetlo di tla laolwa ke Seboka.
Temana ya mashome a mabedi a metso e meraro
Ho behwa ha dikotlo-qobello
Seboka se tla laola dikotlo-qobello tse lokelang ho fuwa mmuso oo e leng setho sa Kopano ka ho etsa phoso ka ho se lefe ka tshwanelo dinyehelo tsa ona tsa bajete ya Kopano ka tsela ena e latelang: ho hana ho bua dikopanong, ho vouta, ho hlahisa baemedi bakeng sa maemo kapa mesebetsi e itseng ka hare ho Kopano kapa ho fola molemo ho mesebetsi e itseng.
Ho feta mona, mmuso ofe kapa ofe oo e leng Setho sa Kopano se hlolehang ho phethahatsa diqeto le maano a Kopano e ka nna ya fumantshwa dikotloqobello tse ding hape tse kang ho hanelwa ka dipalangwang le dikgokahanyo le Ditho tse ding tsa Kopano le mehato e meng ya sepolotiki le moruo e leng tse laolwang ke Seboka.
Temana ya mashome a mabedi a metso e mene
Ntlokgolo ya Mokgatlo wa Kopano
Ntlokgolo ya Mokgatlo wa Kopano e tla ba Addis Ababa mane Rephaboliking ya Bofederale ya Demokerasi ya Ethiopia.
Ho ka nna ha thehwa tse ding tsa diofisi tsa Mokgatlo wa Kopano tse kang Seboka ka kgothaletso ya Lekgotla la Phethahatso.
Temana ya mashome a mabedi a metso e mehlano
Dipuo tse sebediswang
Dipuo tse sebediswang ke Mokgatlo wa Kopano le ditsha tsohle tsa yona e tla ba dipuo tsa Maafrika, Searaba, Senyesemane, Sefora le Sepotoketsi.
Temana ya mashome a mabedi a metso e tsheletseng
Tlhalosetso
Lekgotla la dinyewe le tla emisa ka ditlhalosetso tse tswang tshebedisong ya molao ona o tswang molaong wa motheo. Ho latela ho thehwa ha Seboka, ditaba tsa mofuta ona di tla lebiswa ho Seboka sa Kopano seo sona se tlang ho etsa qeto ka ho latela bongata ba pedi-borarong.
Temana ya mashome a mabedi a metso e supileng
Tshaeno, le Tshebedisano
Molao ona o tla kgona ho saenelwa, ho lokiswa le ho amohelwa ke Mebuso eo e leng ditho tsa Mokgatlo wa Kopano wa Dinaha tsa Afrika ho latela tsela ya tsona ya tshebetso ho latela molao wa motheo.
Disebediswa tsa ... di tla sebediswa ka taelo ya Mongodikakaretso wa Mokgatlo wa Kopano ya Dinaha tsa Afrika.
Mmuso ofe kapa ofe oo e leng Setho sa Mokgatlo wa Kopano ya Dinaha tsa Afrika o nang le tokelo ya ho sebedisa molao ona o tswang molaong wa motheo o tla sebedisa molao ona ka tumello ya Modulasetulo wa Khomishene.
Temana ya mashome a mabedi a metso e robedi
Qalo ya tshebediso
Molao ona o tswang molaong wa motheo o tla qala ho sebediswa ka matsatsi a mashome a mararo kamora ... ke palo ya pedi-borarong ya mebuso eo e leng Ditho tsa Mokgatlo wa Kopano wa Dinaha tsa Afrika.
Temana ya mashome a mabedi a metso e robong
Ho amohelwa ho ba setho
Puso efe kapa efe ya naha ya Afrika e na le hona hore ka nako efe kapa efe kamora tshebediso ya molao ona, e tseb ise Modulasetulo wa Khomishene ka boikemisetso ba yona ho ikobela molao ona le ho amohelwa e le setho sa Kopano.
Modulasetulo wa Khomishene o tla tsebisa mebuso yohle eo e leng ditho hang kamora hoba a amohele tsebiso e jwalo. Kamohelo e tla etswa ke palo efe kapa efe ya mebuso eo e leng ditho tsa Kopano. Qeto e nngwe le e nngwe ya setho se seng le se seng sa Kopano e tla lebiswa ho Modulasetulo wa Khomishene mme yena o tla tsebisa mmuso o amehang hang ha a se a fumane palo e lebeletsweng ya divoutu.
Temana ya mashome a mararo
Thibelo
Mebuso e tla tswela pele ka ntle ho molao wa motheo ha e na dumellwa ho ba le seabo mesebetsing ya Kopano.
Temana ya mashome a mararo a motso o mong
Phediso ya botho
Mmuso ofe kapa ofe o batlang ho fedisa botho ba ona o tla romela lengolo ho Modulasetulo wa Khomishene mme yena o tla tsebisa ditho tse ding ka taba ena. Qetellong ya nako e ka etsang selemo kamora tsebiso ena, haeba tsebiso e sa hulwe, Molao ona o ke ke wa hlola o sebetsa mmusong ona mme mmuso ona o ke ke wa hlola e ba setho sa Mokgatlo wa Kopano.
Ka nako e ka etsang selemo se le senge boletsweng serapeng sa pele sa temana ena, mmuso ofe kapa ofe oo e leng setho mme o batla ho ikgula jwalo ka setho sa Mokgatlo wa Kopano, o tla lebellwa ho phethahatsa ditshwanelo tsa ona tse bolelwang ke molao ona ho fihlela letsatsi leo o itokollang ka lona le fihla.
Temana ya mashome a mararo a metso e mmedi
Dihlomathiso le diphetolo
Mmuso ofe kapa ofe oo e leng setho sa Mokgatlo wa Kopano se na le hona ho fana ka tlhahiso mabapi le dihlomathiso kapa phetolo ya molao.
Ditshisinyo tsa dihlomathiso kapa phetolo di tla romelwa ho Modulasetulo wa Khomishene mme yena o tla fetisetsa taba tsena ho mebuso e meng eo e leng ditho ka nako e ka bang matsatsi a mashome a mararo.
Seboka se tla hlahloba ditshisinyo tsena ho latela dikeletso tsa Lekgotla la Phethahatso nakong ya selemo kamora hoba mebuso eo e leng ditho e tsebiswe ho latela dipehelo tse boletsweng serapeng sa bobedi sa temana ena.
Dihlomathiso le diphetolo di tla amohelwa ke Seboka ka tsela ya hore bohle ba dumellane kapa haeba ho se jwalo ka bongata ba pedi-borarong mme ebe di lebiswa ho ditho ho a hlahlojwa ho latela tsamaiso e theilweng molaong wa motheo. Di tla qala ho sebetsa ka mora matsatsi a mashome a mararo kamora hlahlobo ya Modulasetulo wa Khomishene le ka bongata ba pedi-borarong ba mebuso eo e leng ditho tsa Kopano.
Temana ya mashome a mararo a metso e meraro
Ditlhophiso tsa Diphetoho le Dipehelo tsa Qetelo
Molao ona o qotsitsweng molaong wa motheo o tla sebetsa sebakeng sa Lengolo la tumello la Mokgatlo wa Kopano ya Dinaha tsa Afrika. Le ha ho le jwalo, Lengolo la tumello le tla dula le ntse le sebetsa nakong ya selemo ya diphetoho kapa nako efe kapa efe e ka behwang ke Seboka ho latela nako ya ho qala tshebetso ya molao ona o qotsitsweng molaong wa motheo e le hore Mokgatlo wa Kopano ya Dinaha tsa Afrika o tle o tsebe ho nka dikgato tse tshwanelehang ho amohela maruo ohle a lokelang Kopano esita le tsohle tse amanang le ona.
Dipehelo tsa molao ona o qotsitsweng molaong wa motheo di tla sebediswa kgahlano le dipehelo tse fetofetohang kapa di okamele dipehelo tsena tsa Selekane se thehang Setjhaba sa Moruo sa Maafrika.
Ha molao ona o se o sebetsa, ho tla etswa tsohle tse tshwanelehang ho hlokomela hore ho latelwe dipehelo tsa ona le ho theha makala kapa ditho tse tla laolwa ke molao ona ho latela ditaelo kapa diqeto tse tla nkuwa ke Mekga nakong ena ya diphetoho e boletsweng mona ka hodimo.
Ho latela metheo ya Khomishene, Bongodi ba Mokgatlo wa Kopano ya Dinaha tsa Afrika e tla ba bona bongodi ba nakwana ba Kopano.
Molao ona o hlahisitsweng ka dingolwa tsa dipuo tse nne, e leng Searaba, Senyesemane, Sefora le Sepotoketsi mme dipuo tsena tse nne e le tsa sethatho, o tla ngodiswa ke Bongodikakaretso ba Mokgatlo wa Kopano ya Dinaha tsa Afrika mme kamora hore molao ona o qale ho sebetsa, Modulasetulo wa Khomishene o tla ntsha lengolo la bopaki le netefaditsweng mme le romelwe ho mmuso o mong le o mong o ngodisitsweng. Bongodikakaretso ba Mokgatlo wa Kopano ya Dinaha tsa Afrika le Mongodi wa Khomishene o tla tsebisa mebuso yohle e ngodisitsweng ka matsatsi a hlahlobo le kamohelo mme etlare ha molao ona o qala ho sebetsa, tsena tsohle di tla amohelwa ke Bongodi ba Dinaha tse Kopaneng.
KA BOPAKI BO FELETSENG, RE amohela Molao ona.
E phethahaditswe mane Lome, Thoko (Togo) ka letsatsi la 11 Phupu 2000.
